See hauden in seeja windjen Dach aunjetroffen, uba daut wia nich emm Stich fe äaren Dach toom Jeld saumlen.
Dee Bomberos von de Swift Current Kolonie fäld daut aun jewesse Sachen, un butadem jankat äant in Drone kjeepen, toom ut de Loft no Menschen säkjen, wann mol wäa wach es. Doatoo uba bruckt daut in Drone waut extra goode Kameras un Baterien haft, un waut uck meeja Krauft haft toom aun windje Doag fläjen.
Soon Drone es väl diera aus dee jeweenelje, waut eena jroodsoo kjeepen kaun.
Om Jeld too saumlen, fekoften see Lessa, veschiednet uttoolossen. Aum 27. Febewoa stalden see dann in Äten fekjeepen aun. Doa fekoften see dann uck noch Lessa, un lossten daut ut. Dee Canam word jewonnen von Jacob Wiebe, dee Remolque von Walter Froese un een Drone von Jake Loepky.
See hauden dee Veaunstaultung en Campo 106 em Jebied von dee Bomberos. De Menschen kunnen bennen sennen, soo daut dee Wind nicht stied. Doa kunnen see em Fräden äten un romdriewen.
Dee Wind hilt dee Kjinja uba nich auf toom met dee Fiawäawogges metfoaren. See kunnen doa huech buwen setten un metfoaren.
Dee Menschen wieren seeja unjastettend. See koften Lessa un Äten. Daut Komitee es seeja dankboa fe dee groote Unjastettung. See feelen, daut it sich seeja goot jeloont haft, daut utlossen un Äten fekjeepen aunstallen.
Aules toop wieren bie 900 Menschen toojäajen. Doa worden 7 Schwienkjes jebackt, un 375 Ordasch Tacos worden verkoft.
