In seeja wichkja Pionier fe dee Quellen Kolonie (Los Jagueyes) storf aum 16. April em Ella von 97 Joa. Hee wia eena von dee dree Junges, waut no Mexiko kjeem daut Laund uttomäten, nodäm daut aul jekoft wia. Willi Dueck wia seeja behelplich, en dee Kolonie too deenen. Dree Joa deend hee aus Vorsteher.
Hee un siene Fru Liesbeth wonden 15 Joa en Mexiko, bat see em Joa 1963 no Arborg, Manitoba trocken. Eent von dee Projakjta waut see aunfungen un em Schwung brochten wia eene Klinik. Fru Dueck wia jeliede (RN) Krankenschwesta. Wiels en dee gaunze Jäajend kjeen Krankenhus wia fungen see met ne Klinik aun. Disse Klinik entwekjeld sich en det Casa de Salud.
Dueck wia uck en Kanada seeja äarfolkrikj. Hee bud in Jeschaft opp met Numen Vidir Maschine, wua see feschiednet moaken und fekjeepen. Siene Fru Liesbeth storf em Juli 2012.