Dee Centro Rüstzeit finjt dit Wäakjenenj staut

Nu den 6. bat 8. August finjt dee Centro Rüstzeit en Sainapuchi staut. Doa es Plautz fe 3000 Menschen. Soo väl hant see noch niemols opp eene Rüstzeit jehaut. Daut meent, doa woat nu bestemmt noch Plautz fe soone sennen, waut sich en de latzte Minut noch eenich woaren, doa han too foaren.
Nu Friedach Clock 10:00 fangt dee Rüstzeit aun. Daut wudd doahäa ne goode Idee sennen, goot enne Tiet too foaren, doamet maun Tiet haft, dit Foatich too parken un dann no daut Dack too gonen, wua daut Programm stautfinjt.
Doa sellen nich blooß Aunsproaken un Sinjprogramme jeboden woaren, uba uck Zeichnisse jejäft woaren. Doa send waut Personen, waut von äa Läwen vetallen wellen, von woo see verhäa wieren eeja see omdreiden, un woo äa Läwen nu es.