In poa Monat trij frua daut en Paraguay. Väle Plaunten vefrueren, un dräjden auf. Nu es daut dräch, un opp väle Städen brennt daut. Dee Loft es seeja voaken ruekich. En Brasilien brennt de Wold un de Stappen opp väle Städen, krakjt soo uck en Bolivien, un en Paraguay.
Dee Schoden en de Natua un oppe Weid un Stappen es groot. Väl Weid ve-brennt, väle Tieren un Beem vebrennen.
Opp Städen en Brasilien es daut dit Joa besondasch oach, wiels daut soo seeja dräch es. Dee groota Parana Rifa haft soo weinich Wota aus en de latste 100 Joa nich. Dee woat jeweenlich fe Schäp jebruckt, om dee Arnte wachtoofieren. Nu haft dee soo weinich Wota, daut kjeene Frachtschäp foaren kjennen. Dit betraft besondasch Argentinien. Dee Parana schält von Brasilien no Argentinien. Wann daut en Brasilien dräch es, haft dee Rifa uck en Argentinien weinich Wota.
En dee Jäajend von Rio Verde, Santa Clara un La Yeya verbrennd ver meist twee Wäakj trij väl Kornstroh, un uck waut Korn, waut noch nich jedrascht wia. Äwa 2000 Hekta bebrennd doa. In deel von daut wia blooß Stroh, waut dee Foarma jiern opp de Stapp wellen han, wiels dee Ied daut needich fält. Atelje hauden daut Stroh enjeprasst, un waut Flekja wieren noch nich jedrascht. Een Flekj von 500 Hekta, waut noch nich jedrascht wia, jehied eenen Paraguaya. Dit mieschte doavon woat nich mol aus Fooda too brucken sennen.
