Daut Kjarbsfast, jieda Joa veschieden

Daut 9. Kjarbsfast woat dit Joa mäajaljewies em Friejen stautfinjen. Dee Gimnasios send grundsetzlich too kjlien, wiels dee aula nich jenuech Rum besied han fe dee Utstalungen un Parkplautz. Daut Gimnasio bie Kilometa 18 kunn ne Mäajlickjeit sennen, wann daut Laund besied kunn jebruckt woaren fe in grootet Zelt un Parkplautz, uba daut Gimnasio es dit Joa nich too han. Emmahans brucken daut dich bot 20 Acka fe aules.
Soo, eene Mäajlichkjeit es, daut Fast buten too han. Daut sull uck kjeen Trubbel sennen, wann doa scheenet Wada es. Bat nu es jieda Joa aun dee Kjarbsfastdoag scheenet Wada jewast, bot dit latste Joa aus doa een Jäejenuwend in Hoagelräajen äwa kjeem.
Daut Kjarbsfast wie dit ieschte Joa en Rosenthol, dit tweede joa bie Kilomeeta 28, dann dree Joa en Jnodenthol em Gimnaso, een Joa bie Kilomeeta 29 em Gimnasio, dann intweschen blooß buten fe Youtube, und dann wada bie Kilomeeta 29.
Wua daut ditjoasche Kjarbsfast, dit 9. Fast sennen saul, well daut Komitee nu disse Doag beschluten. Uba kloa es, daut it fe den 25. und 26. Septamba jeplont woaren saul.
En dee näakjste Utgowen von dee Rundschau saul meeja Information jejäft woaren.
Daut Komitee wenscht, daut dit Joa wiels daut nu 100 Joa send waut de Dietsche en Mexiko wonen, weenst 100 groote Kjarbs wudden nom Kjarbsfast jebrocht woaren.